По повод ‘Меѓународниот ден на музеите‘ – 18.05.2014
Меѓународниот ден на музеите е прослава која во светот од 1977 година па наваму, традиционално се организира на 18. мај. Во нејзините рамки се вклучени илјадници музеи од светот, а се практикуваат најразлични настани како посети на археолошки поставки, тури до локалитети и изложби кои се дел од локалните музеи, а треба да го привлечат вниманието на луѓето пред се кон сопственото културно-историско наследство. До 2013 година, настанот ги урна сите рекорди со учество на околу 35 000 музеи од 143 земји во светот, кои беа домаќини на најразлични случувања.
Оваа година, 18 мај, Меѓународниот ден на музеите, тематки е насловен како ‘Музејските колекции прават конекции’. По овој повод “УНЕСКО Клубот ХАЕМУС“ во соработка со Музејот на град Скопје, а поддржан од програмата “Macedonia Vision” на Т.А. Савана, ќе реализира полудневна ексурзија насловена како: ‘Тура низ Отоманското наследство на Скопје‘. Турата ќе ги опфати културно-историските споменици кои се изградиле од моментот на доаѓањето на Турците во Македонија, во јануари 1391 година, па се до Балканските војни и о(п)станале до ден денска во автентична или реконструирана форма.
Итинерар: Султан Муратова џамија (со Саат кулата), Гази Иса Бегова џамија, Исхак Бег (Алаџа) џамија, историскиот дел на Скопје познат како Старата Скопска чаршија (Куршумли ан, Безистен, Сули ан, Чифте Амам, Капан Ан, Даут Пашин Амам), Скопското кулие, Мустафа Пашина џамија, Отоманскиот период на Скопското Кале.
Во турата е вклучен и Музејот на Старата Скопска чаршија, бидејќи целта на оваа екскурзија е посета на локалните музеи кои треба да го привлечат вниманието на луѓето кон културното наследство на Република Македонија.
Цената на еден ваучер е 250 мкд. и од 08.05.2014 (четврток) влезниците ќе можат да се купат во Т.А. Савана на ул. Орце Николов бр. 20, како и на нивните пунктови во Skopje City Mall и во Рамстор.
Датум: 18.05.2014 (недела) Зборно место: Пред портата на Стара чаршија (влезот од Бит пазар) Време на поаѓање: 10:00 ч. Времетраење: 3 – 3,5 часа Цена: 250 мкд. по човек (Влезниците се ограничени и се купуваат во T.A. Савана) Водич: Димитровска Василка, магистер по археологија и професионален туристички водич Организатор: ХАЕМУС – центар за научно истражување и промоција на културата
За Меѓународниот ден на музеите, ХАЕМУС, T.A. Савана и Музејот на град Скопје ви посакуваат многу дружење, забава да научите и по нешто ново за својата и за другите култури и обичаи со кои сме секојдневно опкружени.
