Визната либерализација која за македонските граѓани би требала да се случи по 01. Јануари 2010 година, повторно на дневен ред го донесе менувањето на пасошите, сега во биометриски. На интернет можете да пронајдете дури и мапа на светот каде се патува моментално со македонски пасош без виза.
Во овој контекст не знам колку ви е познат фактот, но независна Република Македонија на своите пасоши втиснува грб кој е всушност грбот на “Народна Република Македонија”. Од својата независност па се до 2006 година насловната страница на пасошите е празна, а потоа се воведуваат новите пасоши на кои е втиснат стариот грб на НР Македонија.
Грбот на Н.Р. Македонија е усвоен на Второто вонредно заседание на народното собрание одржано во Скопје на 26 јули 1946 година, каде што е донесен законот за Грб на Н.Р. Македонија, а членот 1 од овој закон го дава описот (блазонот) на овој грб:
Грбот на Народна Република Македонија е поле опкружено со житно класје испреплетено со плодови афион и листови тутун кои на долната страна се поврзани со лента исшарана со народни мотиви. На лентата е напишано „Н. Р. Македонија“. Меѓу врвовите на класјето се наоѓа ѕвезда петокрака. Во средина на полето се оцртува планина во чие подножје тече река. Зад планината изгрева сонце.
Весникот „Нова Македонија“, два дена подоцна, го објавува овој закон заедно со прикажан грб и објаснување:
Грбот на Народна Република Македонија е симбол на слободата и братството на Македонскиот народ и богатството на Македонската земја. Житното класје, плодовите на афионот и листовите тутун го претставуваат богатството на Македонија и разновидноста на нејзината економија. Петокраката ѕвезда ја симболизира народно ослободителната војна со која Македонскиот народ ја доби слободата. Народниот мотив на лентата го изразува богатството и убавината на народниот бит. Во средината на полето се наоѓа планината Пирин, најголемата македонска планина која била центар на народноосободителните војни во минатото, а реката која тече е реката Вардар, најпознатата Македонска река во Републиката. Пирин и Вардар истовремено ги преставуваат единството на сите делови на Македонија и идеалот на нашиот народ за национално обединување. Сонцето го претставува слободниот и творечки живот во Македонија.
Превземено од © Блогот Хералдика
Една дебата со десетици коментари на мојот профил на фејсбук, ме испровоцира да го поставам овој напис на мојот сајт. Грбот на Република Македонија воопшто не е ревидиран, иако бил направен обид тоа да се стори. Дали сметате дека треба да го задржиме стариот грб, или да го ревидираме во духот на новите теченија? Во тој контекст еве и две размислувања на таа тема:
Јован Јоновски (Форум) – Грбот – полу орел, полу лав?!
Квадратура на кругот – ЕДНО МИСЛЕЊЕ ЗА ПРЕДЛОГОТ ЗА ПРОМЕНА НА ГРБОТ
