Археолошки дневник vol.2.1/2 ©

Archive for the ‘Нумизматика’ Category

На покана од новинарката Лидија Богатинова, вечерва во 19ч. заедно со проф.д-р Никос Чаусидис и господинот Паско Кузман (УЗКН) ќе гостувам во емисијата Фактор 5 на Канал 5 Телевизија. Темата е акцијата на МВР која реши да се справува со крадците на нашето богато културно наследство.

Со акцијата Фаланга (1,2,3,4,5), за која патем сите дознавме вчера од медиумите, почна да се одмотува една многу болна тема за Република Македонија како општество – кој ги краде и препродава артефактите и антиквитетите и со тоа нанесува огромна штета како по науката, така и по идентитетот на една држава. Во изминатите неколку години на моите сајтови и блогови ја следев тематиката за Археомафијата во Македонија (доста често пишуваше и Волан), за која разни ентитети се изјаснуваа де ја има, де ја нема како појава.

Не знам имиња, само она што е пуштено како информација во медиумите од страна на МВР. Белењето на потеклото на антиквитетите и откраднатите артефакти не треба да се бара во Македонија, иако и тоа е многу важно. За да некој предмет стигне до одредена светска аукциска куќа каде ќе го купи некој многу богат колекционер, во меѓувреме треба да добие сертификат за оригиналност, и пред се потекло. Но да, се сложувам, мора да се стави крај и на оваа алка во Македонија која ги опфаќа поситните риби во тој ланец: дивите копачи, домашните колекционерите и трговците со антиквитети од прв ред. Патем, меѓу наведените професии имаше директори на институции и професори. Се надевам дека нема и археолози.

Мојот колега од Франција Georges Depeyrot (Centre de recherches historiques /CNRS/EHESS) пред некој ден ми ја испрати апликацијата за проектот COST, со други зборови именуван како “European monetary unification, from Antiquity to modern times”. За разлика од праксата ваквите мејлови вообичаено да ги препраќам на моите македонски колеги, тука го споделувам видеото, а за дополнителни информации верувам дека можат да се снајдат и без мене.

Моето прашање гласи – A каде е Македонија во овој проект со сите тие “силни” археолози и наоди кои ги имаме? Во најмала рака очекував Нумизматичкиот оддел на Народната Банка да биде партиципант во еден ваков грандиозен проект.