Archive for the ‘Musica ethnica’ Category
Идентитетот на Синтезис бесплатно на Скопското Кале
Еве како лично ги доживеав настапите на Синтезис направени во рамките на нивниот мини-проект кој беше замислен како промоција на културно-историски споменици и локалитети во Македонија на кои тие одржаа концерти.
Да имаш бесплатен концерт на група за која во светот луѓето плаќаат скапи карти и тоа на локалитет кој е од витално значење за светската култура, во наши услови е рамно на подвиг. Но, и ти драг читателу да требаше до монументален објект како што е Скопскиот Римски Аквадукт да дојдеш со помош на гатање на гравчиња зачинето со крос кантри екскурзија низ беспаќата на населбата Бутел, ќе ти беше јасно зошто на денешниот концерт на Синтезис имаше само околу 200 посетители.
Од постот – Синтезис, Римскиот Аквадукт и нашата негрижа за културното наследство
Амамот со децении стоеше руиниран како некоја последна прчварница, додека не започна проектот за ревитализација на Старата чаршија. Јас го паметам како едно запуштено место, лоцирано наспроти кафулињата каде што излегував како тинејџер. Во 2002 год. заврши целосната реконструкција на неговиот ентериер. Оттогаш наваму се користи воглавном за поставување на редовни и повремени изложби и денеска амамот кој блеска со сиот свој сјај, помеѓу сите случувања, оваа сабота ќе го вброи и настапот на етно-групата Синтезис.
Од постот – Сте биле ли некогаш во амам – a во чифт или во тек?
Матка не е само речно крајбрежје и тесни планински патеки.
Матка е мир, духовна рамнотежа…прекрасен пејсаж 
Матка е заборавено македонско катче, тука зад грбот на градот. Блиску, а сепак далеку.
Матка е место каде треба да се запре пропаѓањето на културните и природните вредности. Под итно се потребни неколку археолошки интервенции и конзервации.
Во разговорот Маја ми напомена дека и таа и Синтезис се по малку разочарани за малата посетеност на некои од концертите, што секако пред се се должи на слабото известувањето од страна на медиумите. За да не се случи истото и со културните споменици на Матка, кои секако го заслужуваат вниманието, ќе се потрудам да ви објаснам покрај концертот, какво богатство се крие во пазувите на ова вонземско катче.
Од постот – Синтезис -> Матка -> Made in Macedonia
Со Кибицер и Секи на Матка
Во позадината се гледа црквата Св. Андреја
Да стигнете во Стоби кој се наоѓа во Градско на местото каде реката Еригон (Црна) се влева во Аксиос (Вардар), независно од каде доаѓате, секако морате да му пријдете од автопатот Е 75. Имајте во предвид дека на локалитетот можете да му пристапите од два различни правци.
Така за да ги слушнете Синтезис кои ќе свират во Театарот во Стоби, морате да имате упатство за вашиот итинерар низ локалитетот. Откако на влезот ќе го поминете Музејот, движејќи се по улицата Via Principalis Inferior, прво ги одминувате Цивилната и Северната базилика зад кои се наоѓа Малата бања, а потоа ги поздравувате Евреите во Синагогата базилика. Ако одлучите да свртите на аголот лево вдолж улицата VIa Axia движејќи се накај Римскиот форум, попатно можете да се воодушевувате на мозаиците во Куќата на Псалмите.
Од постот – Упатство за употреба: Како да ги слушате Синтезис во Стоби
Стоби – Блогерите со поубавиот дел од групата Синтезис
Една година подоцна гледам дека некои од поубавите постови сум ги посветила токму на групата Синтезис и нивната благородна идеја за заживување на некои подзаборавени локалитети, иако според третманот од страна на државата би рекла дека сите локалитети ни се некако ептен заборавени. Се надевам дека љубителите на музиката а воедно и на македонското културно наследство нема да ја направат истата грешка. На 30 јуни Синтезис во рамките на Скопското лето ќе го промовираат својот најнов албум ,,Идентитет” со бесплатен концерт на Скопското Кале.
Јас ќе ве очекувам. Скопско Кале е археолошки локалитет на која ја познавам скоро секоја педа бидејќи минатата година работев 7 месеци за време на неговото ископување. За да биде задоволството двојно, доколку се организирате повеќе блогери и ми се најавите, еден час пред настапот на Синтезис од мене ќе добиете бесплатна тура низ локалитетот. До тогаш, оној кој ги слуша нека ужива во нивната музика.
Oфицијален web site на етно групата Синтезис
Oфицијалниот web site за Скопско Kале
Дополнителни линкови:
„Синтезис“ ќе одржи осум концерти на заборавените археолошки локалитети
Синтезис, Римскиот Аквадукт и нашата негрижа за културното наследство
Струмин Гроб & Синтезис – дополнување
Сте биле ли некогаш во амам – a во чифт или во тек?
Синтезис -> Матка -> Made in Macedonia
Упатство за употреба: Како да ги слушате Синтезис во Стоби
Метаморфозите на Скопското Кале
Почнаа ископувањата на Скопското кале (или турбо фолк национализам)
Пуштена web страницата за ископувањата на Скопско Кале
Скопско кале – галерија на наоди – И предметите зборуваат зар не?
Зошто да појдеш до Музеј на град Скопје и да ја видиш поставката за Скопско Кале
Клучни зборови: археологија, културно наследство, Скопско Кале, концерт, музика, етно-група, Синтезис, Скопје, Македонија, archaeology, cultural heritage, Skopsko Kale, Skopje Fortress, concert, music, etno gruop, Synthesis, Skopje, Macedonia
Doulce Mémoire
Анасамблот Doulce Mémoire (Нежни спомени) оригинално е формиран во 1990 година од страна на флејтистот Дени Резен Дадар (Denis Raisin-Dadre). Со текот на годините прераснува во трупа која се посветува на вокалната и инструменталната музика од Ренесансата, онаква како што ја слушале и интерпретирале Leonardo da Vinci, Michelangelo, Henry VII of England … За да ја долови звучната слика на оваа епоха, Doulce Mémoire не враќаат во времето на разните музички формации кои делувале на дворовите во XV и XVI век. Овој ансамбл кој на својот репертоар има дела компонирани за театар, фарси и мадригални комедии честопати гостува на најголемите европски фестивали во Лион, Бон, Амброна, Монтре, Утрехт, Женева, Дубровник итн. Нивната огромна дискографија насекаде е примена со големи пофалби, а добитници се и на многубројни награди.
Doulce Mémoire имав прилика да ги гледам во 1998та година. Концертот беше првично закажан да се одржи во Сули ан, но поради пролетниот дожд беше преместен во Музејот на Град Скопје. Морам да кажам дека дури и во такви услови (музејот не е баш компетентна околина за ваков настан) уживањето беше комплетно. Луѓето свиреа, играа, пееја и глумеа. Ме вратија назад во времето вистински да ги доживеам овие патувачки трупи токму онакви какви што постоеле на дворот на François Ier de France. Вистинска реткост е ваков ансамбл да гостува кај нас и мислам дека публиката најмногу треба да му се заблагодари на Францускиот културен центар во Скопје кое во тоа време имаше големо лоби и беше поактивен отколку што е денеска.
Мал дел од репертоарот на Doulce Mémoire можете да погледнете на Youtube, а албумот Requiem des Rois de France, на мое големо задоволство можете да го симнете тука и тука.
Сте биле ли некогаш во амам – a во чифт или во тек?
Влезот на Чифте амам во Скопје
Кога некој патник-намерник ќе дојдел во Старата скопска чаршија, таа имала да му понуди многу продавници каде што можел да (се) пазарува, неколку анови да јаде и да преспие и два амама каде можел да се избања и релаксира.
Чифте можеби не бил најголемиот амам во старото Скопје, но дефинитивно бил едно од архитектонските ремек дела на средниот век во Македонија.
Луѓето кои патуваат како туристи во Турција, и ден денеска можат како дел од нивните факултативни излети, да појдат во амам. За туристичката атракција број 1 во оваа земја ќе платите најмалку од 10-15 EUR по човек, па и нагоре.
Што ќе ви се случи кога ќе појдете во еден таков модерен амам. Правени по тертипот на старите јавни бањи, процедурата е следна. Прво влегувате во една мала просторија које е сауна. Потоа одите на масажа кај еден батка (а обично се такви и за мажи и за жени) кој со специјално масло за тело и ракавица наменета за тоа, ве масира притоа сминувајќи ви го површинскиот изумрен дел од епидермиот на вашата ценета кожа. Е дури потоа одите во базенот.
Од она што се знае за амамот (исти информации кружат по нетов како ракопис од ресавската школа – 1,2,3) е дека:
Чифте-амамот е амам (јавна бања) во Старата скопска чаршија, Скопје. Подигнат е во средината на XV век од страна на Иса бег и завештан за потребите на издржување на неговите задолжбини во Скопје, медресата и теќето.
Припаѓа на типот на двојни амами (турски: çift – парен, двоен), но е изграден по должина, така што машкиот и женскиот дел се составуваат со просториите за бањање, додека гардеробите се наоѓаат на краевите.Во двата дела ритуалот на капење бил идентичен. Од гардеробата се влегувало во просторијата за аклиматизација. Од неа се влегувало во помошните простории (во женскиот оддел депилација и тоалет, а во машкиот – берберница и тоалет) и во главната просторија за капење. На средината на оваа просторија имало постамент од камен на кој се лежело за препотување или масажа. Ова место во женскиот дел се викало „роза на амамот“. Околу имало три простории со повискока температура, т.н. халвети. Покрај ѕидовите на главната просторија и во халветите, имало поплочени седишта и мермерни корита (курна), од кои се црпелаа водата за капење. Еден од халветите во женскиот дел на амамот бил адаптиран за ритуално капење на скопските евреи и во него наместо мермерно корито имало базен.
Амамот еднаш бил оштетен од големиот пожар во 1689 год. и настрадал во земјотресот од 1963 год. при што претрпел дополнителни оштетувања.
План на основата на Чифте амам
Кликни на планот за зголемена верзија
Амамот е изграден во ист стил како и другите исламски градби од тоа време со користење на цигли, камења и малтер. Во него доминираат две големи куполи сместени на спротивни страни од градбата, а има и повеќе мали куполи кои се наоѓаат во бројните соби, засводувајќи ги.
Она што не можете да го прочитате во книгите или на интернет е дека се користел како бања до 1916/1917 год, а потоа неговите простории биле употребувани како магацини, при што некои од влезовите биле проширувани или затворани, или пак биле пробивани дополнителни нови врати.
Амамот со децении стоеше руиниран како некоја последна прчварница, додека не започна проектот за ревитализација на Старата чаршија. Јас го паметам како едно запуштено место, лоцирано наспроти кафулињата каде што излегував како тинејџер. Во 2002 год. заврши целосната реконструкција на неговиот ентериер. Оттогаш наваму се користи воглавном за поставување на редовни и повремени изложби и денеска амамот кој блеска со сиот свој сјај, заедно со уште неколку објекти во Скопје е дел од комплексот на Националната галерија. Во рамките на НГМ функционира не само како изложбен салон на уметници, туку во него се одржуваат и концерти, еднашка годишно Базарот на ракотворби и разни други манифестации. Меѓу сите овие случувања, оваа сабота ќе се вброи и настапот на етно-групата Синтезис.
Постов беше само мало подсетување за она за кое знаеме дека го имаме, и во кое и покрај сите благодети, за жал не знаеме да уживаме.
Додаток:
Според македонската Википедија, Чифте амам спаѓа во повеќе категории: Скопски знаменитости | Исламски споменици на културата во Македонија | Стара скопска чаршија | Исламска уметност во Македонија итн.
Инаку влезот на Чифте амам е во близината на Сули ан, откај улицата ,,Битпазарска”, во срцето на Чаршијата.
На сајтот на Националната галерија може да се погледне одлично слајд шоу со слики од амамот.
п.с. Дел од сликите за моето слај шоу ги позајмив од SmugMug.
