Archive for the ‘Конференција, симпозиум’ Category
Блог-Археологија, создавање извори на знаење со отворен пристап
На покана од New York University Skopje во мај 2008 година учествував на Конференцијата Glocal 2.0 со темата ,,Blogging Archaeology: Creating an Open Access Source for Knowledge“. Со текот на годините, како археолог, но и како активен блогер, се покажа дека археологијата во спрега со Новите медиуми е одлична релација за надградување на знаењето во дигиталниот свет. Во отсуство на публикации, јавни дебати и конференции, интернетот е во моментов единствениот извор за новите пронајдоци во македонската археологија. Текстот беше публикуван два пати, еднашка на македонски јазик во списанието ‘Културен жнивот’, и еднашка на англиски јазик во ‘АРХЕО’, најпрестижното списание за археологија во Словенија.
Со истата, но апдејтувана и освежена тема настапив на XX редовен симпозиум на Македонското Археолошко Научно Друштво, иако не сум многу најсигурна колку колегите ме разбраа што сакам да кажам, оти не добив ниту еден коментар.
Во текстот е поместено моето искуство, сите предизвици и проблеми со кои се соочив изминатите години на Интернет додека блогирав за археологијата. И покрај тоа што овој тип на блогирање се уште нема добиено академски статус во светот, сепак постојат значителен бројот на сериозни Археоблогови кои третираат одредени теми од археологијата или културното наследство.
Некои од прашањата со кои се бавам се: како ќе знаете дека мојот блог е веродостоен, како ќе распознаете квази-наука од вистинска археологија, како се прави проценка на содржината на еден археолошки научен блог и секако одговорот на прашањето како да се креира отворен пристап на знаење кое може да го обликува интернет заедницата.
Немојте никогаш да заборавите дека: За некои генерации, Новите медиуми се единствениот извор на инфомации.
Блог-Археологија, создавање извори на знаење со отворен пристап
Патувам за Хаг на EAA 2010
Пред некој ден добив известување со кое ми го потврдија учеството на годинешната конференција на European Association of archaeology која ќе се одржи во Хаг на почетокот од септември. Темата со која се пријавив на годинешниот симпозиум носи наслов: From transition to antiquisation, through and beyond the new media in Republic of Macedonia, и претставува делумно преработен и освежен текст на истоимената презентација со која настапив на конференцијата Glocal во Скопје.
Ова не е мое прво учество на најголемиот (и најмасовниот) собир на европски и светски археолози, а како годините минуваат се повеќе млади археолози од Македонија се пријавуваат за настап со свои теми, што ми е особено драго.
Инаку ЕАА (European Association of Archaeologists) е една од најсериозните организации во сферата на археологијата. Од своето основање во 1994 година, таа за само неколку години стана значаен субјект во друштвено-политичкиот живот на Европа, што го наведе Советот на Европа да ја признае како свое официјално советодавно тело за археологија. Заслугата за спасувањето на бројните археолошки локалитети ширум Европа се должи токму на ангажирањењто на ЕАА.
Еден од основачите на оваа организација и член на официјалниот борд, проф. д-р Предраг Новаковиќ, го присвоив како незваничен ментор кога во 2007 година добив стипендија од Министерството за наука на Република Словенија за истражувачки престој во Љубљана. Моето должно почитување кон професорот Новаковиќ се состои во разговорите на тема археологија –> политика, бидејќи тој е одличен стручњак на наведенава тема и многу ми помогна од еден поинаков аспект да го согледам овој панаѓур на суети полиен со национализам и поткрепен со археолошки артефакти. Ги читав неговите критички осврти, го слушав на предавањата на факултет, а бев присутна и во Задар (во рамките на симпозиумот на ЕАА) каде имаше прилично солидно излагање на дебатата Does the “Archaeology of Europe” exist?.
Повторно ја изложувам пред очите на јавноста состојбата со македонската археологија, продолжувајќи ја епопејата во серијал, бидејќи претходниот пат настапив со темата Transitional archaeology in a Transitional Country (врска 1, 2). Како што имам повеќепати до сега напоменато, се заблагодарувам на последната (се уште моментална) гарнитура на Владата на РМ која со своите постапки во полето на археологијата ми остави материјал кој би ми бил доволен да пишувам научни трудови и да се шетам по симпозиуми до крајот на животот. А доколку платат трошоци, во некоја референца може и да ги споменам со име и презиме. 
Ретко пишувам на темата политизирање на македонската археологија, и тоа е најчесто во форма на веќе сублимирано мислење или истражување, а ситуацијата ми е олеснета со тоа што ниту сум во институција да трпам опструкции, ниту пак во партија да извршувам нечии туѓи директиви. И веројатно сум една од ретките што одам за Хаг, а не сум ни криминалец ни политичар. 
XXI Симпозиум на МАНД
На официјалната страница на МАНД вчера беше објавен повик за учество на редовниот XXI Симпозиум кој годинава ќе се одржи во Струмица, во хотел Цар Самуил, бања Банско, во месец октомври. Рокот за поднесување на темите е до 30.06.2010 година, па како и на изминатите симпозиуми, и годинава планирам да се пријавам најмалку со две презентации и да дадам предлог за работилница во која би се зборувало околу ‘Примената на новите медиуми во културното наследство’. Иако се’ уште не знам како тоа ќе биде прифатено и дали ќе ми направат опструкција, како што тоа вообичаено знаат некои од моите колеги мошне умешно да го менаџираат.
Овој пат се надевам дека ќе има поголемо присуство на печатените и електронските медиуми, а јас ќе се обидам за прв пат да ги пренесувам впечатоците online преку моите сајтови, блогови и сметки на социјалните мрежи. Воедно, овој пост е отворена покана за сите медиуми кои би сакале да знаат што се случувало со македонската археологија во изминатите 2 години, а немале можност тоа да го дознаат на поинаков начин.
Линк: XXI Симпозиум на МАНД
Поврзани текстови:
МАНД 2006
Археоблог дел од престојниот XX редовен симпозиум на Македонското Археолошко Научно Друштво
Археолошки впечатоци од 20 симпозиум на МАНД
