Home Културно наследство Направи си бизнис план за менаџирање со културни добра

Направи си бизнис план за менаџирање со културни добра

407 views
0

Минатата недела имав можност да бидам дел од една интересна работилница насловена истоветно како и македонско издание на публикацијата „Бизнис планирање за рехабилитација на недвижни културни добра – Прирачник за изработка и спроведување“, која е издадена на македонски јазик а во превод од српски јазик.

Оваа работилница за којашто учесниците можеа претходно да се пријавуваат онлајн, беше замислена и организирана од Управата за заштита на културното наследство (УЗКН) на Република Македонија. Покрај тоа што беше промовирана книгата прирачник, на целодневната работилница учествуваа стручни лица од институциите за заштита на недвижното културно наследство (заводи за заштита и конзерваторски центри), локални самоуправи и професионални здруженија, како и претставници од граѓанскиот сектор.

Честопати во свои пишани и јавни обраќања сум обрнувала внимание на менаџментот како основа за бизнис планирање во сферата на културното наследство. Оттука, ми се допадна целта на оваа работилница да се внесат нови содржини и приоди за заштита на културното наследство засновани на неговата (само)одржливот, а во истовремена спрега со јакнењето на капацитетите на стручните лица од сферата на заштитата и управувањето со недвижното културно наследство за (бизнис) планирање.

Покрај промоцијата на прирачникот, беа одржани и две предавања на гости од Србија, како и интерактивна работилница со цел динамична изработка на бизнис план за одреден објакт. Ни припадна честа како case study да го работиме тимски во 3 групи случајот „Офицерски дом – Битола“. Работилницата ја водеше м-р Кристина Бицева од УЗКН, а со свои презентации учествуваат Христина Микиќ од Групата на Креативна економија од Белград и Естела Радоњиќ Живков од Републичкиот завод за заштита на спомениците на културата на Република Србија.

Како некој кошто го менаџира културното наследство на Република Македонија, за мене ова беше мошне полезна работилница и се надевам дека ќе ги има и понатаму во слична или модифицирана форма, бидејќи инвестицијата во градење на човечки капацитети кои работат со културното наследство е од витална важност за една држава. Чинам дека ова е голем исчекор кон вмрежување на сите оние субјекти кои работат во полето на менаџментот и планирањето со културното наследство и секако добра основа за понатамошните насочувања.

И како за крај, верувам дека има многу луѓе кои не знаат дека УЗКН е институција која функционира како дел од Министерството за култура, а лично познавам доста граѓани кои имале потреба од нивните правни совети и не знаеле како и каде да се обратат. Затоа ја поздравувам идејата на УЗКН која полека се отвора кон јавноста и дава едно ново лице во правното вреднување на сите видови културно наследство, во насока на добивање вистинска слика за богатствата кои што ги поседува Република Македонија.

LEAVE A REPLY

Please enter your comment!
Please enter your name here