Ничиј багер, на ничија земја
Канал5 телевизија во своите последователни прилози: Институциите ја префрлаат одговорноста за уништувањето на археолошкиот локалитет Градиште во Демир Хисар (12.09.2009) и Видливи остатоци на искршена керамика поради ископувања со тешка механизација (14.09.2009) продолжува да известува за уништувањето на археолошкиот локалитет Градиште, кај селото Граиште, демирхисарско од страна на мобилните оператори. Прилозите со видео материјал можат да се погледнат на страниците од оваа телевизија, но заради архивирање истите се закачени и на Youtube.
12.09.2009
14.09.2009
Краткото сиже во случајот Градиште вели дека во неделата на 06.09.2009 добив мејл од читател кој ме известува дека нешто чудно се случува со овој локалитет кој се наоѓа во близина на Демир Хисар. Во вторникот појдов до локалитетот да ги проверам информациите. Во средата го објавив извештајот на мојот сајт и монтираното видео со снимки на Youtube, а од четвртокот почнаа прилозите со ударната вест на Канал5 телевизија која ги “затече” мобилните оператори во Македонија на кои не им е прв пат да постават базна станица за антена на археолошки локалитет.
Вп меѓувреме извршена е истрага од страна на МВР, а исто така на увид отишла и екипа од Музејот и Завод Битола, кои го утврдиле истото што го напишав на сајтот како извештај пред една недела. Акрополот на локалитетот е 2/3 уништен засекогаш и искршени се и уништени огромен број на артефакти од различни периоди. Но и после 10 дена се уште не знаеме кој точно го направил сквернавењето, бидејќи не е издадена довола од ниту една институција или министерство, а багерот кој стои се уште на акрополот е единствениот сведок за сквернавењето на овој познат локалитет.
Фотографии на самиот локалитет и форензиката која ја направив сведочат за траги на најмалку две различни возила, а по консултација со стручњаци (пред се физичари) мошне е чудно што за заземјувања на антена од мобилен оператор биле ископани 2 рова во должина од 200 метри, ширина од 10 метри и длабочина од 1 метар. Како да сакал некој да гради воено укрепување, а не заземјување за громобран!
За среќа, се работи за огромен локалитет со распространетост на 44 хектари, па така еден дел од акрополот како и првите/најниските фортификации се се’ уште достапни за научни проучувања. Доколку би се извеле заштитни ископувања на Градиште, како што е редот, тоа би значело проект кој би вклучил најмалку 300 луѓе од Демир Хисар и околината. Бидејќи се работи за површински огромен локалитет хетероген по капацитет, веројатно овие ископувања би траеле 6-7 месеци во годината, најмалку 3-4 години, за да се дојде до одредени базични резултати. Тоа би значело месечни придонеси за сите кои работат на овој локалитет, или со други зборови, најмалку 300 фамилии во заборавениот Демир Хисар буквално би егзистирале од него. Економската исплатливост и туристичка валозризација на локалитетот можеби ќе ја продискутирам во некој нареден текст.
За поголема резолуција кликни на фотогрфијата
Според изјавата на Паско Кузман, директор на УЗКН – дадена за неделникот “Сега”, за едно истражување на локалитет каде мобилните оператори сакаат да постават антена, се плаќа помеѓу 5.000 и 10.000 евра на институцијата во чија надлежност е локалитетот, а кое зависи од обемот на заштитно археолошко истражување кое мора да се направи пред градежните работи да почнат. Треба ли да се пресметува колку ќе чини оваа оштета … 500 000 евра, 1 милион евра … Штетата е непроценлива, не се мери во бројки, но кога е веќе направена, кривецот треба да си ги исплати парите без право на било каков приговор.
Поврзани текстови:
- Базна станица на мобилни оператори уништи археолошко наоѓалиште во демирхисарско
- Видео запис од уништениот локалитет Градиште, с.Граиште, Демир Хисар
- Извештај од терен – Увид во оштетувањата на локалитетот Градиште, с. Граиште од страна на мобилните оператори
- Како мобилните оператори ги уништуваат археолошките локалитети во Република Македонија
- За туѓи бели дворови, копај си црни гробови!
