ЧПП
Дали си навистина археолог ?
Јас сум дипломиран археолог и историчар на уметноста на Катедрата по ‘Историја на уметност и археологија’ во Скопје, во класата на проф. д-р. Драги Митревски. Моментално ја завршувам својата магистратура која беше поставена како проект помеѓу катедрите по археологија во Белград и Љубљана.
Дали овој сајт го правиш од хоби?
Овој сајт го замислив како мини-проект за да го опипа пулсот на јавноста и заинтересираноста на луѓето за археологијата и сопственото културно наследство. После неполни две години виртуелен живот како блог, Археолошкиот дневник прерасна во сајт, единствен од ваков вид на Балканот. Сајтот почнав да го работам како хоби, но денеска тој е дел од мојот професионален живот и секако едно од најдобрите CV-ја.
Какви содржини се опфатени со Археолошкиот дневник ?
Своевремено, содржините на блогот беа групирани во две поголеми категории: културното наследство и лични литературни творби. Вторите се веќе одвоени во посебен сајт насловен како Архео-креатива. Археолошки дневник е еден од ретките тематски сајтови во кој се пишува за археологијата допирајќи поширок дијапазон на сродни елементи од популарната култура. Не се изоставени ниту компатибилните науки како историја, историја на уметност, етнологија, архитектура и др.
На кој начин овој сајт придонесува во развојот на информатичкото општество?
Освен тоа што Археолошки дневник како сајт (со свои придружни блогови на македонски и англиски јазик) има големо значење за развојот на македонската блогосфера, како и секој друг поединечен блог, преку него континуирано се врши промоција на македонското материјално и духовно културно наследство. Тоа докажува дека и научните профили во Македонија се способни да ги користат технолошките достигнувања во 21 век, каде одредени содржини можат да се презентираат преку електронски медиум и на тој начин да станат достапни за сите.
Зошто пишуваш на македонски, а не и на англиски јазик?
Прво затоа што целната публика се сите посетители, читатели и коментатори кои пред се го зборуваат или разбираат македонскиот јазик, а второ затоа што веќе постои и англиска варијанта на Археолошкиот дневник која се трудам да ја ажурирам јредовно.
